ԱՄՆ Սենատի առևտրի հանձնաժողովը հավանություն է տվել օրինագծի, որը նախատեսում է խստացնել սահմանափակումները չինական կապիտալի մասնակցությամբ ավտոարտադրողների նկատմամբ։ Reuters-ի փոխանցմամբ՝ այն ընդունվելու դեպքում կարող է տարածվել նաև գերմանական Mercedes-Benz ընկերության վրա։
Առաջարկվող կարգավորումների համաձայն՝ ամերիկյան շուկայում աշխատելու արգելքը կարող է վերաբերել այն ընկերություններին, որոնց բաժնետոմսերի ավելի քան 15 տոկոսը պատկանում է չինացի ներդրողներին։ Հանձնաժողովի նախագահ Թեդ Քրուզի խոսքով՝ այս սահմանման տակ կարող է հայտնվել նաև Mercedes-Benz-ը, քանի որ ընկերությունում չինական բաժնեմասնակցությունը կազմում է գրեթե 20 տոկոս։ Միաժամանակ նա նշել է, որ օրինագիծը դեռ լրամշակման կարիք ունի։
Քրուզը նաև հայտնել է, որ փաստաթղթի որոշ դրույթներ աջակցություն են ստացել General Motors-ի կողմից։ Ընկերությունը, սակայն, հայտարարել է, որ նախաձեռնության նպատակը առանձին մրցակիցների դեմ պայքարը չէ, այլ ամերիկյան արտադրության և ոլորտի միջազգային մրցունակության խթանումը։
Օրինագծի համահեղինակ, սենատոր Բեռնի Մորենոն նշել է, որ ավտոարտադրողներին կարող է տրամադրվել անցումային շրջան մինչև 2030 թվականը, իսկ որոշ ընկերությունների համար հնարավոր են բացառություններ։
Mercedes-Benz-ը, իր հերթին, ընդգծել է ԱՄՆ-ում իր գործունեության մեծ ծավալը և հայտնել, որ պատրաստ է հաշվի առնել օրենսդրական պահանջները՝ միաժամանակ պաշտպանելով աշխատակիցների, գործընկերների և հաճախորդների շահերը։
