Իրանի արտգործնախարար Աբբաս Արաղչին շաբաթ ժամանել է Օման և հանդիպել Օմանի արտգործնախարար Բադր ալ-Բուսաիդիի հետ՝ հաղորդում է Tasnim լրատվական գործակալությունը։
Ավելի վաղ հաղորդվել էր, որ ԱՄՆ-ը և Իրանը նախատեսում են շաբաթ օրը Օմանում վերսկսել շփումները։ CBS-ը հաղորդել է, որ ԱՄՆ նախագահ Դոնալդ Թրամփը հանձնարարել է փոխնախագահ Ջեյ Դի Վենսին, պետքարտուղար Մարկո Ռուբիոյին, փեսա Ջարեդ Քուշներին, հատուկ դեսպանորդ Սթիվ Ուիթքոֆին շարունակել բանակցային գործընթացը. սակայն պարզ չէ, թե ովքեր կարող են մասնակցել Օմանում կայանալիք բանակցություններին։
Ավելին՝ ամերիկյան կողմը պահանջում է, որ բանակցությունների ժամանակ Իրանը հրապարակայնորեն ճանաչի, որ Հորմուզի նեղուցը լիովին բաց է նավերի համար և ապահովի այդ տրանսպորտային միջանցքում իրավիճակի վերադարձը այն կարգավիճակին, որը նախորդել է 2026 թվականի փետրվարի 28-ին տարածաշրջանում հակամարտության սկսվելուն:
Axios-ը հաղորդում է, որ ԱՄՆ-ն Իրանին վերջնագիր է ներկայացրել. նման հայտարարությունը պետք է արվի մինչև հուլիսի 11-ը՝ շաբաթ օրը։ Հակառակ դեպքում, ամերիկացի պաշտոնյաներից մեկը զգուշացրել է, որ «իրանցիների համար լավ օր չի լինի»։
Միևնույն ժամանակ, Reuters-ը և Axios-ը, հղում անելով ԱՄՆ բարձրաստիճան պաշտոնյաներին, հաղորդում են, որ Իրանը ԱՄՆ իշխանություններին հայտնել է, թե Հորմուզի նեղուցում առևտրային նավերի վրա վերջերս կատարված հարձակումները «համակարգի խափանման» հետևանք են։
