POLITICO-ի հաղորդմամբ՝ ՆԱՏՕ-ի ընդլայնված առաքելության շրջանակում Արկտիկայի շրջանում ավիակիր հարվածային խումբ տեղակայելուց հետո Մեծ Բրիտանիան որսացել է ռուսական ռազմական ինքնաթիռներ։
Մեծ Բրիտանիայի պաշտպանության նախարարությունը հայտարարել է, որ «Bear F» տիպի ռուսական հակասուզանավային ինքնաթիռները բազմիցս մոտեցել են Նորվեգական ծովում գտնվող բրիտանական ավիակիր խմբին՝ կատարելով, Լոնդոնի գնահատմամբ, «անվտանգության կանոններին չհամապատասխանող և ոչ պրոֆեսիոնալ» մանևրներ։ Գերատեսչության տվյալներով՝ ռուսական ինքնաթիռները նաև մեծ քանակությամբ հիդրոակուստիկ բույեր՝ սուզանավեր հայտնաբերելու և հետևելու սարքեր, են նետել HMS Prince of Wales ավիակրի անմիջական հարևանությամբ։
Ի պատասխան՝ բրիտանական ավիակրի տախտակամածից օդ են բարձրացվել F-35B կործանիչներ, որոնք հուլիսի 2-ին, Նորվեգիայի արևմուտքում նրանց գործողությունների ընթացքում, որսացել և ուղեկցել են ռուսական ինքնաթիռներին, փոխանցում է DW-ն։ HMS Prince of Wales-ը՝ բրիտանական երկու ավիակիրներից մեկը, ներկայում ՆԱՏՕ-ի հակաօդային պաշտպանության գործողություններին F-35-ների կիրառմամբ մասնակցող առաջին եվրոպական ավիակիրն է։
Նավի տեղակայումը կապված է բարձր լայնություններում ՆԱՏՕ-ի ներկայության ուժեղացման հետ։ Մեծ Բրիտանիան նաև առաջին անգամ ստանձնել է դաշինքի հատուկ նշանակության ուժերի ստորաբաժանման հրամանատարությունը, որը ՊՆ-ում անվանում են ՆԱՏՕ-ի արագ արձագանքման ուժերի «նիզակի սայր»՝ ունակ մի քանի օրվա ընթացքում տեղակայվել աշխարհի ցանկացած կետում։
