Գերմանիայի արտաքին գործերի նախարար Անալենա Բերբոքը չհայտարարված այցով ժամանել է Կիև։ Նրա այցի մասին նախապես չի հայտարարվել անվտանգության նկատառումներից ելնելով։
«Գերմանիան, աշխարհի բազմաթիվ գործընկերների հետ, ամուր կանգնած է Ուկրաինայի կողքին», - Կիևում ասել է Գերմանիայի ԱԳՆ ղեկավարը։ Նրա խոսքերը մեջբերում է Գերմանիայի ԱԳՆ մամուլի ծառայությունը։ Նախարարը հիշեցրել է, որ Գերմանիան վերջերս ընդլայնել է այսպես կոչված ձմեռային պաշտպանության հովանոցը՝ լրացուցիչ 170 միլիոն եվրո հատկացնելով Ուկրաինային էներգետիկ օգնության համար։
Նա անդրադարձել է նաև Գերմանիայի հակաօդային պաշտպանության նախաձեռնությանը։
«Յուրաքանչյուր հակաօդային պաշտպանության համակարգ կարևոր է», - ասել է նա: Միևնույն ժամանակ, նա պնդել է, որ Ուկրաինան «ավելի մոտ է ԵՄ-ին, քան երբևէ»:
«Մենք աջակցում ենք բարեփոխումների կուրսի համարձակ քայլերին և շարունակում ենք խրախուսել դրանք հատկապես ԶԼՄ-ների ազատության և կոռուպցիայի դեմ պայքարի ոլորտում»,- եզրափակել է Գերմանիայի արտգործնախարարը։
Սա Բերբեքի ութերորդ այցն է Ուկրաինա՝ 2022 թվականի փետրվարի 24-ին ռուսական հատուկ ռազմական գործողության մեկնարկից ի վեր։ Վերջին անգամ նա Կիև է այցելել 2024 թվականի մայիսին։
Գերմանիան ԱՄՆ-ից հետո Ուկրաինային զենք մատակարարող երկրորդ երկիրն է։ Գերմանիան մինչ այժմ միջոցներ է հատկացրել Կիևին ռազմական աջակցության համար և պարտավորվել է մոտ 28 միլիարդ եվրոյի ապագա ծախսեր կատարել:
