Վրաստանի ընդդիմադիր կուսակցությունների ներկայացուցիչները լրագրողներին ասել են, որ հրաժարվում են համագործակցել երկրի դատախազության հետ՝ խորհրդարանական ընտրություններում հնարավոր կեղծիքների հետաքննության շրջանակներում և պահանջում են միջազգային հանրությունից սկսել այդ գործընթացը։
Չորեքշաբթի ավելի վաղ Վրաստանի դատախազությունը հայտարարել էր, որ երկրի Կենտրոնական ընտրական հանձնաժողովի դիմումի հիման վրա հետաքննություն է սկսել հոկտեմբերի 26-ի խորհրդարանական ընտրություններում հնարավոր կեղծիքների վերաբերյալ։ Գերատեսչությունը հայտարարել է, որ մտադիր է հարցազրույց վերցնել բոլորից, ովքեր կարող են տեղեկություններ ունենալ խախտումների մասին, սակայն Վրաստանի նախագահ Սալոմե Զուրաբիշվիլին առաջիններից էր, ով կանչվեց հարցաքննության։
«Մենք հիմար չենք, որ հավատանք, որ դատախազությունը ազնիվ հետաքննություն կանցկացնի, համապատասխան մանդատով և իրավասություն ունեցող միջազգային առաքելությունը պետք է իրականացնի, իսկ մինչ այդ այս ընտրությունները լեգիտիմություն չեն ունենա և չեն կարող ունենալ»,-ասել է «Ուժեղ Վրաստան» կուսակցության առաջնորդներից Սալոմե Սամադաշվիլին։
Ըստ «Կոալիցիա հանուն փոփոխությունների» կուսակցության անդամ Զուրաբ Ջափարիձեի, քիչ հավանական է, որ ընդդիմադիրները և նախագահը հարցաքննության գան դատախազություն, քանի որ, ըստ նրա՝ «ոչ ոք չի ծրագրում մասնակցել այս աբսուրդին»: Ջափարիձեն պնդել է, որ ընդդիմությունն ունի ընտրությունների արդյունքները կեղծելու ապացույցներ, սակայն կոնկրետ տվյալներ չի ներկայացրել։ Միաժամանակ, նա հայտարարել է, որ կվստահեն միայն միջազգային հետաքննությանը։
