Հարավային Կորեայի նախագահ Լի Ջե Մյունգը առաջարկել է մազաթափության բուժումը ներառել պետական բժշկական ապահովագրության համակարգում՝ ընդգծելով, որ ճաղատությունը երիտասարդների համար այլևս զուտ կոսմետիկ խնդիր չէ, այլ դարձել է սոցիալական և հոգեբանական լուրջ մարտահրավեր։
Ինչպես տեղեկացնում է The Guardian-ը, նա նշել է, որ հատկապես երիտասարդ տղամարդկանց համար մազաթափությունը վերածվել է «գոյատևման հարցի»։ Հարավային Կորեայում գործում է համընդհանուր առողջապահական ապահովագրության համակարգ, որը ֆինանսավորվում է քաղաքացիների եկամտի հիման վրա կատարվող վճարներով։
Ներկայումս ապահովագրությունը ծածկում է մազաթափության բուժումը միայն բժշկական պատճառներով, սակայն տղամարդկանց ճաղատության բուժման մեծ մասը համակարգում ներառված չէ։Լի Ջե Մյունգը կառավարությանը հանձնարարել է ուսումնասիրել ապահովագրական ծածկույթի ընդլայնման հնարավորությունները։
Նրա գնահատմամբ՝ շատ քաղաքացիներ պարբերաբար վճարում են ապահովագրավճարներ, սակայն չեն ստանում շոշափելի օգուտներ, ինչի հետևանքով հատկապես երիտասարդների շրջանում աճում է անարդարության և օտարացվածության զգացումը։
