Նեպալի կառավարական հանձնաժողովը սեպտեմբերին տեղի ունեցած հակակառավարական բողոքի ցույցերի պատճառած նյութական վնասը գնահատել է 580 միլիոն դոլար, հաղորդում է The Himalayan Times-ը։
Հանձնաժողովի ղեկավար Ռաբիբալ Պանթը հինգշաբթի օրը վերջնական զեկույցը ներկայացրել է վարչապետ Սուշիլա Կարկիին: Տարբեր կառույցների վնաս է գրանցվել երկրի 77 շրջաններից 54-ում: Զոհերի թիվը գնահատվում է 77, վիրավորվել է 429 մարդ, այդ թվում՝ 17 երեխա:
Ընդհանուր առմամբ, բողոքի ցույցերի ընթացքում տարբեր աստիճանի վնաս է կրել մոտ 2700 կառույց։ Կորուստների մեծ մասը՝ 300 միլիոն դոլար, բաժին է ընկել կառավարական հաստատություններին։ Վնասվել է նաև մոտ 13000 տրանսպորտային միջոց։
Սեպտեմբերի սկզբին Նեպալի մայրաքաղաք Կատմանդուում և այլ քաղաքներում անկարգություններ բռնկվեցին։ Հիմնական մասնակիցները ուսանողներ և Z սերնդի ակտիվիստներ էին (մարդիկ, որոնք ծնվել են 1990-ականների կեսերից մինչև 2010-ականների սկզբը)։
