ԱՄՆ նախագահ Դոնալդ Թրամփը հայտարարել է, որ Վլադիմիր Զելենսկին միակ ուկրաինացի ներկայացուցիչն է, որին դուր չի գալիս Վաշինգտոնի կողմից առաջարկվող ճգնաժամի կարգավորման նախագիծը։
«Ես կարծում էի, որ մենք շատ մոտ էինք Ռուսաստանի հետ համաձայնագրի կնքմանը։ Ես կարծում էի, որ մենք շատ մոտ էինք Ուկրաինայի հետ համաձայնագրի կնքմանը։ Իրականում, բացառությամբ նախագահ Զելենսկու, նրա մարդկանց դուր է գալիս համաձայնագիրը»,-ասել է Թրամփը Սպիտակ տանը լրագրողների հետ հանդիպման ժամանակ։
Թրամփը նաև նշել է, որ համաձայնագրի նախագիծը բաղկացած է «չորս կամ հինգ մասից»։
«Դա բավականին բարդ է, քանի որ պետք է տարածքը բաժանել որոշակի ձևով։ Դա հեշտ չէ», – հայտարարել է ամերիկացի առաջնորդը՝ նշելով, որ Ուկրաինայում կարգավորման հասնելը հազար անգամ ավելի դժվար է, քան անշարժ գույքի գործարք կնքելը։
