Արդյոք մենք մեր ունեցած ֆինանսական միջոցները կարողանում ենք արդյունավետ ծախսել, օրինակ «Շողակաթ» ալիքը, որը պետք է իրականացներ հոգևոր-մշակութային հեռարձակում, բավականին միատարր հեռուստաընկերություն է, որը միայն ներկայացնում է ՀԱԵ-ին: Այս մասին 2025 թվականի բյուջեի նախագծի քննարկման ժամանակ, դիմելով Հանրային հեռարձակողի խորհրդի նախագահ Արա Շիրինյանին, ասաց իշխանական պատգամավոր Ծովինար Վարդանյանը:
«Չեմ կարող ասել, որ այն բազմատարր, մշակութային ալիք է, որը կարող է ներգրավվել ավելի շատ հեռուստադիտողների: Ֆինանսների արդյունավետության տեսանկյունից գուցե վերաբաշխումների կարի՞ք կա, մտածե՞լ եք այս ուղղությամբ: Պետությունը հանրային գումար է տալիս մի ալիքի, որը ընդհանրապես չի արդարացնում ինքն իրեն:
Կա բյուջե, որը կարելի է ավելի արդյունավետ տեղում ներդրում անել, օրինակ՝ Հանրային ռադիոյում, որը ավելի արդյունավետ կաշխատի այս ալիքի գումարով»,- ասաց պատգամավորը:Արձագանքելով՝ Արա Շիրինյանն ասաց. «Ոչ թե մտածել ենք, այլ դրանով զբաղվում ենք ամեն օր:Արդյունավետ ծախսը ենթադրում է որոշակի գործողություններ, որոնք մենք չափում ենք միջազգային ստանդարտներով: Ես այսպես հասկացա՝ կարելի է «Շողակաթը» փակել, ֆինանսավորել Հանրային ռադիոն:
Դա օրինաչափ գործողություն չէ, որովհետև դա կառավարում չէ, այլ պանիկայի մեջ ինչ-որ գործողություններ կատարել է:Ես չեմ համարում, որ թե՛ «Շողակաթ»-ը, թե՛ Հանրային ռադիոն անարդյունավետ են աշխատում, նրանք աշխատում են իրենց կարողությունների չափով, երբեմն նույիսկ ավելի:
«Շողակաթ»-ի նման ալիքը միջազգային նորմ է, ու այնպես չէ, որ դա իրենք հորինել են մեզ համար, իրենք էլ են այդպես ապրում:Եթե մշակութային հաղորդում չլինի, մեր հասարակությունը կդառնա քաղաքական կուսակցությունների հասարակություն: Ճաշակի հարցով չեմ ուզում վիճել Ձեզ հետ, տիկին Վարդանյան, լավ կամ վատը շատ մասնավոր նկատառում է: Եթե կա ավելի լավը, կարող ենք դիտարկել ավելի լավի ներգրավման հնարավորությունը»:
աղբյուր՝ Թերթ.ամ
