Իտալիայի գաստրոէնտերոլոգիայի ազգային ինստիտուտի գիտնականները պարզել են, որ շաբաթական ավելի քան 300 գրամ հավի մսի կանոնավոր օգտագործումը մեծացնում է մարսողական համակարգի քաղցկեղի զարգացման ռիսկը։ Հետազոտության արդյունքները հրապարակվել են Nutrients ամսագրում։
Իրենց աշխատանքի ընթացքում մասնագետները վերլուծել են 50 տարեկանից բարձր գրեթե հինգ հազար մարդկանց առողջության և սննդի վերաբերյալ տվյալները, որոնք հավաքվել են երկու տասնամյակի ընթացքում։ Գիտնականները պարզել են, որ նրանք, ովքեր շաբաթական ուտում էին չորսից ավելի բաժին (300 գրամ) թռչնամիս, երկու անգամ ավելի հավանական էր, որ մահանան ստամոքս-աղիքային քաղցկեղից, քան նրանք, ովքեր ուտում էին մեկ բաժնից պակաս։
Նման սննդակարգ ունեցող մարդիկ նաև հայտնվել են լյարդի, ենթաստամոքսային գեղձի, լեղապարկի և ուղիղ աղիքի քաղցկեղ զարգացնելու ռիսկի տակ։ Բացի այդ, հավի մսի մեծ քանակությամբ օգտագործումը կապված էր ցանկացած պատճառով մահվան ռիսկի 27%-ով բարձրացման հետ։
Ավելին, այս ռիսկերն ավելի բարձր էին տղամարդկանց շրջանում, չնայած դրա պատճառները դեռևս լիովին պարզ չեն։ Հնարավոր բացատրությունները կարող են ներառել տղամարդկանց և կանանց միջև հորմոնալ մակարդակի տարբերությունները, ինչպես նաև այն փաստը, որ տղամարդիկ հակված են ավելի շատ միս օգտագործել։
Գիտնականները ենթադրում են, որ հավի բարձր ջերմաստիճաններում եփելիս արտադրվող վնասակար քիմիական նյութերը կարող են բջիջների վնասում առաջացնել և նպաստել քաղցկեղի առաջացմանը։
Հետազոտության վրա աշխատելիս հեղինակները հաշվի են առել այնպիսի գործոններ, ինչպիսիք են վատ սովորությունների առկայությունը և մասնակիցների մարմնի զանգվածի ինդեքսը։ Այնուամենայնիվ, գիտնականները ընդունեցին, որ ֆիզիկական ակտիվության մակարդակի վերաբերյալ տեղեկատվության բացակայությունը կարող էր լուրջ սահմանափակում լինել աշխատանքի համար։
Թարգմանությունը՝ Euromedia24.com-ի
