Առնվազն 95 պաղեստինցի է զոհվել երկուշաբթի օրը Գազայի հատվածում Իսրայելի կողմից իրականացված օդային հարվածների հետևանքով, հաղորդում է կատարական «Ալ Ջազիրա» հեռուստաալիքը։
Հեռուստաալիքը հայտնել է, որ Իսրայելը շարունակել է հարվածներ հասցնել Գազայի հատվածում, այդ թվում՝ տեղահանված պաղեստինցիների վրաններին, որի հետևանքով զոհվել է առնվազն 95 մարդ։
«Ալ Ջազիրան» նաև հաղորդում է, որ Գազայի կառավարության մամուլի ծառայության տվյալներով՝ մայիսի 27-ից ի վեր Իսրայելի իշխանությունների կողմից Միացյալ Նահանգների մասնակցությամբ ստեղծված Գազայի մարդասիրական օգնության հիմնադրամի բաշխման կետերում օգնություն փնտրելիս զոհվել է 751 և վիրավորվել ավելի քան 4900 տեղացի։
Գազայի առողջապահության նախարարության տվյալներով՝ մարտերի ընթացքում զոհվել է ավելի քան 57,500 մարդ, վիրավորվել է գրեթե 136,900-ը։
