Ռուսաստանին և Ադրբեջանին կարող են փորձել ներքաշել հակամարտությունների մեջ․ Դաղստանի ղեկավար

«Մենք տագնապով ու ցավով ենք հետևում այն ամենին, ինչ այսօր տեղի է ունենում աշխարհում։ Ցավոք, Ռուսաստանի և Ադրբեջանի հարաբերություններում որոշակի դժվարություններ են առաջացել»։ Այս մասին սոցցանցերում գրել է Դաղստանի ղեկավար Սերգեյ Մելիքովը։

«Բայց համոզված եմ, որ դրանք բոլորը կլուծվեն խաղաղ ճանապարհով՝ հաշվի առնելով ժողովուրդների շահերը և հարգելով մեր հարաբերությունների պատմությունը։

Այսպիսի դժվարին ժամանակներում միշտ գտնվում են մարդիկ, որոնք ձգտում են իրավիճակն օգտագործել իրենց նպատակների համար՝ Ռուսաստանը ներսից թուլացնելու, երկպառակություն սերմանելու, եղբայրական ժողովուրդներին միմյանց դեմ տրամադրելու համար։

Սա հատկապես վերաբերում է բազմազգ Դաղստանին, որը տասնամյակներ շարունակ ապրում է խաղաղության և համերաշխության մեջ իր մերձավոր հարևանների հետ։ Մեր հանրապետությունում Ադրբեջանից սերած շատ մարդիկ կան, որոնք Դաղստանն իրենց տունն են համարում։ Մեր կապերն ավելին են, քան պարզապես աշխարհագրականը։ Դա պատմություն է, բարեկամական կապեր, մշակույթ, համատեղ կյանք։ Ցանկանում եմ ընդգծել, որ հենց Դաղստանում են ադրբեջանցիները բնիկ ժողովուրդ։

Սակայն այժմ հնարավոր են մեզ սադրելու, հակամարտությունների մեջ ներքաշելու, այնպիսի արարքների դրդելու փորձեր, որոնց համար հետո ամոթ կլինի։ Սրանք նրանց հնարքներն են, ովքեր ո՛չ Դաղստանին, ո՛չ Ադրբեջանին, ո՛չ էլ ողջ Ռուսաստանին խաղաղություն և կայունություն չեն ցանկանում։

Մենք արդեն բազմիցս տեսել ենք, թե ինչպես են արտաքին ուժերը փորձում ուրիշի ձեռքերով ապակայունացնել իրավիճակը։ Ի վերջո, նրանք ձախողվել են, քանի որ մեր ժողովրդի իմաստությունը, միասնությունն ու համախմբվածությունը բարձր են եղել այդ կեղտոտ խաղերից։

Ես դիմում եմ բոլորին՝ և՛ դաղստանցիներին, և՛ մեր եղբայր ադրբեջանցիներին. թույլ մի՛ տվեք սեպ խրել մեր միջև։ Մի՛ տրվեք զգացմունքներին, մի՛ տրվեք սադրանքներին, մի՛ իջեք կենցաղային ազգայնականության մակարդակին։ Հավատացե՛ք միայն պաշտոնական և ստուգված տեղեկատվությանը։

Մենք միասին շատ բաների միջով ենք անցել և սա էլ կհաղթահարենք։ Բոլոր դժվարությունները ժամանակավոր են, իսկ եղբայրությունն ու արժանապատվությունը մեզ հետ են ընդմիշտ», - գրել է Մելիքովը։