Աֆղանստանի արտաքին գործերի նախարարության խոսնակ Հաֆիզ Զիա Ահմադը երկուշաբթի օրը հայտարարել է, որ «Թալիբան» շարժման գլխավորած Աֆղանստանի կառավարության պատվիրակությունը ժամանել է Դոհա՝ մասնակցելու Աֆղանստանում թմրանյութերի դեմ պայքարի և մասնավոր հատվածի զարգացման հարցերով ՄԱԿ-ի աշխատանքային խմբերի նիստերին։
Աֆղանստանի պատվիրակության կազմում էին, մասնավորապես, Արտաքին գործերի նախարարության, Ներքին գործերի նախարարության, Առողջապահության նախարարության, Արդյունաբերության և առևտրի նախարարության և Կենտրոնական բանկի ներկայացուցիչներ։
Ահմադի խոսքով՝ աֆղան պաշտոնյաները մտադիր են մի քանի հանդիպումներ անցկացնել ՄԱԿ-ի կողմից նախաձեռնված Աֆղանստանի վերաբերյալ բանակցային գործընթացին մասնակցող երկրների և միջազգային կազմակերպությունների ներկայացուցիչների հետ՝ երկրում թմրանյութերի ապօրինի շրջանառության կանխարգելման և վերահսկման, թմրամոլների բուժման, ինչպես նաև մասնավոր հատվածում համագործակցության զարգացման հարցերի շուրջ։
Ինչպես ավելի վաղ հայտնել էր ՄԱԿ-ում Կատարի մշտական ներկայացուցիչ Ալիա Ահմեդ բին Սաիֆ ալ Թանին, թմրանյութերի դեմ պայքարի աշխատանքային խմբի երրորդ և Աֆղանստանում մասնավոր հատվածի զարգացման աշխատանքային խմբի երկրորդ նիստերը կկայանան Դոհայում՝ ՄԱԿ-ի կողմից մեկնարկած բանակցային գործընթացի շրջանակներում։
