2026 թվականի հունվարից ֆրանսիական Ռիվիերայի շրջանում կսահմանափակվի հատկապես մեծ չափերի զբոսաշրջային նավերի մուտքը և ուղևորների ամենօրյա իջեցումը՝ մարդկանց կուտակումն ու շրջակա միջավայրի աղտոտումը նվազեցնելու համար:
Աշխարհի գլխավոր կինոփառատոնի տունը՝ Կանն հանգստավայրը, միացել է ավելորդ զբոսաշրջության աճող գլոբալ հակազդեցությանը և «խիստ կանոններ» է մտցրել զբոսաշրջային նավերի համար, գրում է Euronews-ը:
Հաջորդ տարվանից նավահանգիստ կթույլատրվի մտնել միայն 1000-ից պակաս ուղևոր ունեցող նավերին, օրական իջնել կթույլատրվի ոչ ավելի, քան 6000 ուղևորի։ Ավելի մեծ նավերը ստիպված կլինեն ուղևորներին Կանն տեղափոխել փոքր նավակներով:
Անցյալ տարի Ֆրանսիա է այցելել մոտ 100 միլիոն մարդ՝ ավելին, քան որևէ այլ եվրոպական երկիր, և ավելին, քան հանրապետության սեփական բնակչությունն է, նշում է Euronews-ը։
