Վրաստանի ընդդիմության ներկայացուցիչները մեկնում են արտասահման՝ հրահանգներ ստանալու, ապա դրանք երկրի ներսում իրականացնելու համար, լրագրողներին ասել է Վրաստանի վարչապետ Իրակլի Կոբախիձեն։
«Ընդդիմության ներկայացուցիչները գործուղվում են հրահանգներ ստանալու համար, նրանք նույնիսկ սեփական կարծիք չունեն, նրանք սովորական գործակալներ են։ Նրանք գործուղվում են տարբեր արտասահմանյան գրասենյակներ՝ հրահանգներ, առաջադրանքներ ստանալու, ապա կատարում են դրանք», - ասել է Կոբախիձեն։
Ինչպես նշել է Վրաստանի կառավարության ղեկավարը, սա ունի նաև դրական կողմ, մասնավորապես՝ արտասահմանից եկող հրահանգների շնորհիվ վրացական ընդդիմությունն ամբողջությամբ ոչնչացնում է ինքն իրեն։
«Դրսից նրանք ստանում են այնպիսի հանձնարարություններ, որոնք կրկին հանգեցնում են ընդդիմության կործանմանը։ Թող մասնակցեն նման հանդիպումների, ստանան հրահանգներ, հանձնարարություններ։ Մենք կտեսնենք, թե նրանք որքան հեռու կգնան», - հավելել է վարչապետը։
