ԱՄՆ-ի և Չինաստանի միջև առևտրի դեէսկալացիան դրական նորություն է համաշխարհային առևտրի համար, ինչը մեծապես նվազեցնում է համաշխարհային ռեցեսիայի մտավախությունները, ասել է ՌԴ ԱԳՆ պաշտոնական ներկայացուցիչ Մարիա Զախարովան։
Չինաստանը և Միացյալ Նահանգները երկուշաբթի օրը հայտարարեցին, որ պայմանավորվել են նախնական համաձայնության շուրջ՝ փոխադարձ առևտրային մաքսատուրքերը մինչև 10% իջեցնելու մասին, որոնք ուժի մեջ կմտնեն մայիսի 14-ից 90 օրով:
Արդյունքում, Չինաստանը սկսեց 10% մաքսատուրք սահմանել ներկրվող ամերիկյան ապրանքների վրա, իսկ Միացյալ Նահանգները սկսեց գանձել 30% չինական ապրանքներից, քանի որ 20% «ֆենտանիլ» մաքսատուրքը շարունակում է գործել։
«Չինաստանի և ԱՄՆ-ի միջև առևտրի դեէսկալացիան դրական նորություն է համաշխարհային առևտրի համար: Այս քայլը մեծապես նվազեցնում է համաշխարհային տնտեսական անկման մտավախությունները, որոնք աճել են վերջին ամիսներին», - ասել է Զախարովան ճեպազրույցի ժամանակ:
Ինչպես նշել է ՌԴ ԱԳՆ պաշտոնական ներկայացուցիչը, Մոսկվայի իշխանությունները ակնկալում են, որ Չինաստանի և ԱՄՆ-ի միջև առևտրային խորհրդակցությունների մեխանիզմը ապագայում թույլ կտա երկու երկրներին մշակել առևտրատնտեսական հարաբերությունների փոխադարձ ընդունելի պարամետրեր։
