Այո, Երևանում խնդիրները շատ են և գնալով շատանալու են, որովհետև քաղաքի բնակչությունն աճում է։ Արդեն 1 մլն 200 հազար մարդ կա։ Այս մասին, այսօր՝ հոկտեմբերի 15-ին, Երեւանի ավագանու նիստի ժամանակ հայտարարեց Երևանի քաղաքապետ։ Տիգրան Ավինյանը՝ հավելելով, որ քաղաքի բնակչության աճի հետ կապված կան բազմաթիվ պրոցեսներ:
Նա կոչ արեց նայել, թե ինչ է արել քաղաքապետարանն այդ հարցերը լուծելու համար. «Երևանում այս տարի 38 ֆուտբոլային դաշտ է կառուցել Երևանի քաղաքապետարանը, և տարեցտարի դրանց քանակն ավելացնում ենք։ Երևանում ե՞րբ եք տեսել այս ծավալի բակային աշխատանքներ։ 134 բակում հիմնանորոգում ենք անում, իսկ եթե հաշվի առնենք նաև վերանորոգվող բակերը, 200-ից ավել է լինում։ Այս ծավալի աշխատանք չի արվել, և այս ծավալի մեջ կարող են լինել խնդիրներ»,-ասաց նա:
Ավինյանը նաև նկատեց. «Մենք չենք ասում, որ անսխալական ենք ու ամեն ինչ 100% ճիշտ ենք անում։ Բայց այն պնդումը, թե իրականում չի արվում կամ թերանում ենք ու ուշադրություն չենք դարձնում թերություններին, իրականությանը չի համապատասխանում»։
Քաղաքապետը նաև վստահեցրեց, որ ընդունում է խելամիտ քննադատությունը, սակայն կոչ արեց վերհիշել, թե Մերգելյանի այգին կամ Օղակաձև զբոսայգու տարբեր հատվածներ ինչ տեսք են ունեցել և հիմա ինչ են դարձել. «Ես հրավիրում եմ բոլորիդ այգիներից մեկի՝ հենց նույն՝ Մերգելյանի բացմանը, այնտեղ հատուկ ստենդ կդնենք, թե ինչ է եղել այդ այգին նախկինում ու ինչ է դարձել։ Խնդրեմ, կգաք այդտեղ, կխոսենք»։
