Թուրքիայի արտգործնախարար Հաքան Ֆիդանը հույս է հայտնել, որ Ռուսաստանի Դաշնության, Ադրբեջանի, Հայաստանի և Իրանի արտգործնախարարները կմասնակցեն 3+3 ձևաչափով հանդիպմանը, որը նախատեսվում է անցկացնել հոկտեմբերի 18-ին Ստամբուլում։ Այս մասին նա հայտարարել է Անկարայում Հորդանանի արտգործնախարարի հետ բանակցություններից հետո կայացած մամուլի ասուլիսում, փոխանցում է ՏԱՍՍ-ը։
«Մենք շարունակում ենք աշխատել և խորհրդակցել Հարավային Կովկասի հարցերի շուրջ տարածաշրջանի երկրների հետ 3+3 ձևաչափով։ Հուսով եմ, որ այս կարևոր հարթակի երրորդ հանդիպումը կկայանա հոկտեմբերի 18-ին Ստամբուլում։ Հանդիպմանը կմասնակցեն Ադրբեջանի, Հայաստանի, Իրանի և Ռուսաստանի արտաքին գործերի նախարարները»,– ասել է Ֆիդանը։
