Եվրամիությունը և Մեծ Բրիտանիան ծրագրում են պաշտպանության և անվտանգության մասին համաձայնագիր ստորագրել մայիսին կայանալիք ԵՄ-Մեծ Բրիտանիա գագաթնաժողովում՝ ԱՄՆ նախագահ Դոնալդ Թրամփի՝ ՆԱՏՕ-ի անդամ մյուս երկրներին աջակցությունը կտրելու սպառնալիքների ֆոնին, գրում է Financial Times-ը՝ վկայակոչելով անանուն դիվանագետներին:
Financial Times-ը ապրիլի 9-ին գրել է, որ բրիտանական պաշտպանական և տեխնոլոգիական ընկերությունները նամակով դիմել են Մեծ Բրիտանիայի վարչապետ Քիր Սթարմերին և Եվրահանձնաժողովի նախագահ Ուրսուլա ֆոն դեր Լայենին՝ կոչ անելով ավելի մեծ ջանքեր գործադրել՝ Լոնդոնի և Բրյուսելի կառավարությունների միջև անվտանգության նոր պայմանագիր կնքելու համար:
Ավիատիեզերական, տեխնոլոգիական և արդյունաբերական լոբբիստական խմբերը նամակով դիմել են Մեծ Բրիտանիայի վարչապետին և Եվրահանձնաժողովի ղեկավարին՝ կոչ անելով համաձայնագիրը ստորագրել մայիսի 19-ին կայանալիք ԵՄ-Մեծ Բրիտանիա գագաթնաժողովում։
