«Ժողովուրդ» օրաթերթը գրում է. ««Ժողովուրդ» օրաթերթը դեռևս 2024 թվականին բարձրաձայնել էր Ազգային ժողովում տեղի ունեցած այն աղմկահարույց միջադեպի մասին, երբ Կառավարության հետ հարցուպատասխանի ընթացքում լրագրողներին բռնի ուժով դուրս հանեցին ԱԺ նիստերի դահլիճի օթյակից։ Այդ դեպքով նախաձեռնվել էր քրեական վարույթ՝ ՀՀ քրեական օրենսգրքի 237-րդ հոդվածի 2-րդ մասի հատկանիշներով՝ լրագրողի մասնագիտական օրինական գործունեությունը խոչընդոտելու առերևույթ դեպքի առթիվ։
Հաղորդման հիմքում եղել էր նաև «Իրազեկ քաղաքացիների միավորում» ՀԿ համակարգող Դանիել Իոաննիսյանի դիմումը, որտեղ արձանագրված էր, որ բաց ընթացակարգով անցկացվող ԱԺ նիստի ընթացքում լրագրողներին զրկել են իրենց մասնագիտական պարտականությունները կատարելու հնարավորությունից։ Սակայն «Ժողովուրդ» օրաթերթի լրագրողները ոչ միայն ականատես են եղել այդ ամենին, այլև փաստել են, որ ՊՊԾ աշխատակիցներին լրագրողներին օթյակից դուրս բերելու հրահանգը տվել է հենց ԱԺ աշխատակազմի ղեկավար, ՔՊ-ական Դավիթ Առաքելյանը, որը նաև անձամբ վերահսկել է այդ գործընթացը օթյակի միջանցքում։Դեպքից հետո մի շարք լրագրողներ հրավիրվել են Քննչական կոմիտե և հարցաքննվել որպես վկաներ։ Ցուցմունքներ են տվել «Ժողովուրդ» օրաթերթի լրագրող Քնար Մանուկյանը, «Թիվ 5» հեռուստաընկերության լրագրող Կարինե Մանգասարյանը, «24News»-ի լրագրող Հերմինե Միքայելյանը և News.am-ի լրագրող Ռուզան Խաչատրյանը։ Նրանք ներկայացրել են իրենց տեսածն ու լսածը։
«Ժողովուրդ» օրաթերթը երեկ կրկին դիմել է ՀՀ Քննչական կոմիտե՝ հետաքրքրվելով, թե ինչ փուլում է գտնվում այս քրեական վարույթը։ Ի պատասխան՝ Քննչական կոմիտեից հայտնել են միայն, որ «քրեական վարույթը շարունակվում է»։Այսօր իրավիճակն արդեն փոխվել է։ ՔՊ ընտրացուցակի վերջնամասում գտնվող Դավիթ Առաքելյանը գտնվում է արձակուրդում և օգոստոսի 2-ից այլևս չի զբաղեցնի ԱԺ աշխատակազմի ղեկավարի պաշտոնը։ Սակայն նրա մասնակցությամբ նախաձեռնված քրեական վարույթը շարունակում է մնալ նույն՝ «քննության փուլում» կարգավիճակում։
Այստեղ արդեն հարց է առաջանում՝ ուղղված ՀՀ Քննչական կոմիտեի նախագահ Արթուր Պողոսյանին. ի՞նչն է շուրջ երկու տարի քննվում մի գործով, որի առանցքային հանգամանքները տեղի են ունեցել բաց նիստի ընթացքում, ուղիղ եթերում, տեսանկարահանվել են, իսկ լրագրողները մանրամասն ցուցմունքներ են տվել։ Եթե նման գործը երկու տարի անց էլ չի հասնում իրավական հանգուցալուծման, ապա դա արդեն ոչ թե քննության բարդության, այլ քննչական մարմնի աշխատանքի արդյունավետության հարց է։
Արթուր Պողոսյանի ղեկավարած Քննչական կոմիտեի այս գործելաոճի հետևանքով լրագրողների խախտված իրավունքները շարունակում են մնալ առանց արդյունավետ պաշտպանության։
Իսկ երբ լրագրողի մասնագիտական գործունեությանը խոչընդոտելու վերաբերյալ քրեական վարույթը տարիներով մնում է անավարտ, դա վտանգավոր ազդակ է բոլոր նրանց համար, ովքեր կարծում են, թե լրագրողների իրավունքները կարելի է խախտել՝ առանց իրական իրավական հետևանքների։ Սա քննչական մարմնի կաշկանդվածության վառ դրսևորումն է. երբ խոսքը վերաբերում է Ալեն Սիմոնյանի թիմակցին՝ ՔՊ-ականին, նրանց վերաբերյալ գործերը տարիներով փոշոտվում են դարակներում»։
Մանրամասները՝ «Ժողովուրդ» օրաթերթի այսօրվա համարում:
