Ռուսաստանը փոխզիջման հնարավորություն չի տեսնում Ուկրաինայում օտարերկրյա «խաղաղապահների» տեղակայման հարցում, հայտարարել է ՌԴ ԱԳ նախարար Սերգեյ Լավրովը։
«Մենք փոխզիջման տեղ չենք տեսնում: Այս քննարկումն ընթանում է բացահայտ թշնամական նպատակներով: Նրանք չեն թաքցնում, թե ինչի համար է դա իրենց պետք»,- РИА Новости-ի փոխանցմամբ՝ ասել է Լավրովը Զիմբաբվեի արտգործնախարար Ամոն Մուրվիրայի հետ բանակցություններից հետո կայացած մամուլի ասուլիսում:
Ինչպես հիշեցրել է ռուս նախարարը, եթե Ուկրաինայում օտարերկրյա զորախումբ տեղակայվի, արևմտյան երկրները չեն ցանկանա համաձայնության գալ խաղաղ կարգավորման պայմանների շուրջ, քանի որ այդ կոնտինգենտը «տեղում փաստեր» կստեղծի։
The Telegraph թերթը, հղում անելով բրիտանական կառավարության աղբյուրներին, հունվարի 16-ին հայտնել է, որ Մեծ Բրիտանիայի և Ֆրանսիայի ղեկավարները գաղտնի քննարկում են հակամարտության ավարտից հետո Ուկրաինա համատեղ «խաղաղապահ ուժեր» ուղարկելու հարցը։ Աղբյուրները նշում են, որ Մեծ Բրիտանիայի վարչապետ Քիր Սթարմերը «դեռևս լիովին հակված չէ» նախաձեռնությանը, մինչդեռ Ֆրանսիայի նախագահ Էմանուել Մակրոնը շարունակում է առաջ մղել Ուկրաինա զորքեր ուղարկելու գաղափարը, որը նախկինում քննարկվել է Վլադիմիր Զելենսկու և Լեհաստանի վարչապետ Դոնալդ Տուսկի հետ։
Ռուսաստանի արտաքին հետախուզության ծառայության մամուլի բյուրոն ավելի վաղ հայտնել էր, որ Արևմուտքը երկրում կտեղակայի այսպես կոչված մոտ 100 հազարանոց խաղաղապահ զորախումբ՝ Ուկրաինայի մարտունակությունը վերականգնելու համար։ SVR-ն կարծում է, որ դա կլինի Ուկրաինայի փաստացի օկուպացիա: ՌԴ նախագահի մամուլի քարտուղար Դմիտրի Պեսկովը հայտարարել է, որ խաղաղապահների տեղակայումը հնարավոր է միայն կոնկրետ հակամարտության կողմերի համաձայնությամբ։ Նրա խոսքով, Ուկրաինայում խաղաղապահների մասին խոսելը վաղաժամ է։ Ավելի վաղ նա նաև առանց մեկնաբանության էր թողել հայտարարությունները, թե իբր Ռուսաստանը դեմ չի լինի Ուկրաինայում խաղաղապահների տեղակայմանը։
Թարգմանությունը՝ Euromedia24.com-ի
