Մեծ Բրիտանիան և Ֆրանսիան հույս ունեն մի քանի օրում վերջնական տեսքի բերել Ուկրաինայի վերաբերյալ սեփական խաղաղության ծրագիրը՝ այն ԱՄՆ նախագահ Դոնալդ Թրամփին ներկայացնելու համար։ Այս մասին հայտնում է Reuters-ը՝ եվրոպական դիվանագիտական աղբյուրներին հղումով։
«Մենք ակնկալում ենք, որ այս պլանը կկազմվի օրերի ընթացքում, ոչ թե շաբաթների ընթացքում»,- ասել է գործակալության զրուցակիցներից մեկը։ Մեկ այլ եվրոպացի դիվանագետ ասել է, որ գաղափարը «իրերը կարգի բերելն է», այդ թվում՝ ԱՄՆ-ի և Ուկրաինայի միջև:
Reuters-ի աղբյուրների համաձայն՝ Սպիտակ տանը Վլադիմիր Զելենսկիի և Թրամփի միջև տեղի ունեցած վիճաբանությունն արագացրել է Լոնդոնի և Փարիզի կողմից իրենց սեփական առաջարկների մշակումը։ Սկզբնական փուլում դրանք կարող են ենթադրել կարճաժամկետ հրադադար, իսկ հետագայում պահանջել անվտանգության ավելի լայն երաշխիքներ։
Թե՛ Մեծ Բրիտանիան, թե՛ Ֆրանսիան ընդունում են, որ միայն ԱՄՆ-ը կարող է նման երաշխիքներ տրամադրել։Գործակալության տվյալներով՝ նման պլանի մշակումը կարող է կրկին ճանապարհ բացել Մեծ Բրիտանիայի վարչապետ Քիր Սթարմերի և Ֆրանսիայի նախագահ Էմանուել Մակրոնի համար դեպի Սպիտակ տուն՝ Թրամփի հետ բանակցությունների համար։
Այնուամենայնիվ, այս փուլում պարզ չէ, թե արդյոք այս հանդիպմանը կմասնակցի նաև Զելենսկին։
