Ֆրանսիայի Ազգային ժողովի ծայրահեղ աջ «Ազգային հանրահավաք» խմբակցության ղեկավար Մարին Լը Պենը հայտարարել է, որ անընդունելի է ֆրանսիական զորքեր ուղարկել Ուկրաինա այլ նպատակներով, քան ՄԱԿ-ի հովանու ներքո խաղաղապահ լինելը։
«Ֆրանսիական մարտական զորքեր ուկրաինական հող ուղարկելը խելագարություն է»,- ասել է քաղաքական գործիչը երկուշաբթի օրը Ուկրաինայում տիրող իրավիճակի վերաբերյալ խորհրդարանական քննարկման ժամանակ։
Նրա խոսքով, «կարելի է դիտարկել միայն «կապույտ սաղավարտների» մանդատով գործողությանը հնարավոր մասնակցությունը»։
Լը Պենը նաև քննադատել է Ֆրանսիայի նախագահ Էմանուել Մակրոնի գաղափարը՝ միջուկային զսպման համաեվրոպական ուժ ստեղծելու մասին։ ԱՄ պատգամավորների ղեկավարը կարծում է, որ «համատեղ օգտագործումը նշանակում է դրա չեղարկում»։ Նրա կարծիքով, «միջուկային զենքը ինքնիշխանության ամենաբարձր աստիճանն է»։
Интерфакс-ի փոխանցմամբ՝ Ֆրանսիացի քաղաքական գործիչը կոչ է արել «իրատեսությամբ աջակցել Ուկրաինային» և «նկատի ունենալ սեփական ազգային շահերը»։
Թարգմանությունը՝ Մանուել Թամազյանի
