Նոր առեղծվածային մանրամասներ են ի հայտ եկել 95-ամյա Ջին Հեքմենի և նրա 63-ամյա կնոջ՝ Բեթսի Արակավայի մահվան մասին։ Հայտնաբերվելիս Արակավայի մարմինը մասամբ մումիֆիկացված է եղել, հայտնում է TMZ-ը։
Ոստիկանության որոշման համաձայն՝ Արակավան հայտնաբերվել է լոգարանում։ Կար նաև դեղահաբերի բաց փաթեթ «ցրված սեղանի վրա», իսկ գլխի կողքին կար մի սև տաքացուցիչ, որն ըստ երևույթին ընկել էր նրա մահից հետո: Նրա մարմնի կողքին ընկած էր նաև սատկած գերմանական հովիվը՝ զույգի երեք շներից մեկը: Հատկանշական է, որ երբ Արակավային հայտնաբերեցին, նրա մարմինն արդեն սկսել էր քայքայվել: Դաշնակահարուհու դեմքն ուռել էր, իսկ ձեռքերն ու ոտքերը մումիա էին դարձել, ինչը ենթադրում էր, որ զույգը կարող էր մի քանի շաբաթ մահացած լինել: Ջին Հեքմենի մարմինը հայտնաբերվել է տան թիկունքային սենյակում, որի կողքին ընկած են եղել արևային ակնոցներ և ձեռնափայտ, ինչը վկայում է հանկարծակի անկման մասին: Բացի այդ, նրանց տան մուտքի դուռը բաց է եղել, սակայն ոստիկանները ներխուժման հետքեր չեն արձանագրել։
Ավելի վաղ Հեքմենի դուստրը՝ Էլիզաբեթը ենթադրել էր, որ իր հայրն ու խորթ մայրը կարող էին մահանալ շմոլ գազից թունավորվելուց։ Սակայն դեպքի վայր ժամանած փորձագետները պնդում են, որ արտահոսքի հետքեր չեն հայտնաբերել։ Մասնավորապես, New Mexico Gas Company-ն հայտնել է, որ «ներկայումս չկան նշաններ կամ ցուցումներ, որ տան մեջ կամ շրջակայքում խողովակների հետ կապված խնդիրներ են եղել»:
Օսկարի կրկնակի դափնեկիր Ջին Հեքմենի և նրա կնոջ՝ Բեթսի Արակավայի մահվան մասին հայտարարվել է փետրվարի 26-ին։ Նյու Մեքսիկո նահանգի Սանտա Ֆե քաղաքի իրենց տանը մահացած են գտել զույգին և նրանց շներից մեկին։
Թարգմանությունը՝ Մանուել Թամազյանի
