Բաքվում ապօրինի պահվող հայ պատանդներին, գերիներին հայրենիք վերադարձնելու պահանջով բողոքի ակցիաները Երևանում շարունակվում են։
Նախորդ շաբաթվա վերջին հասարակական-քաղաքական դաշտի ներկայացուցիչները բողոքի ակցիա իրականացրեցին ՀՀ արտգործնախարարության մոտ. պահանջը մեկն էր՝ նիստ հրավիրել ՀՀ-ում հավատարմագրված օտարերկրյա դեսպանների մասնակցությամբ և նրանց ներկայացնել Բաքվում հայ պատանդների նկատմամբ իրականացվող խոշտանգումները։
Այնուհետև ակցիաները շարունակվեցին կառավարության և ՀՀ-ում ՄԱԿ գրասենյակի մոտ։
Այսօր ևս այդ բողոքի ակցիաները Երևանում շարունակվում են։Հայաստանի գրողների միության անդամ, արձակագիր, դրամատուրգ Գուրգեն Խանջյանի խոսքով՝ հայ պատանդներին, գերիներին հայրենիք վերադարձնելու համար, նախ Հայաստանում իշխանությունը պետք է փոխվի՝ գան ազգային ուժեր, որոնք կբանակցեն այդ հարցի շուրջ։«Այս հարցի հետ կապված ճանապարհը դժվար է, այսինքն՝ դժվար է այն իրագործել։
Կարծում եմ՝ ամբողջ հանգույցն իշխանության մեջ է, և միայն իշխանափոխությունից հետո է հնարավոր հարաբերություններ հաստատել դաշնակիցների, մոտիկ հարևանների հետ, որոնց միջոցով էլ հնարավոր կլինի ձայն բարձրացնել ու բանակցություններ վարել։ Ըստ իս, այստեղ բանակցություններն ընթանում են ավելի շատ սեփական իշխանությունը պահպանելու գնի շուրջ, քան թե Արցախի շահերի կամ պատանդների համար։ Ես չգիտեմ՝ գուցե գերիներին ազատելը հակառա՞կ է իրենց շահերին։
Միայն մեր ձայնով գերիներին ազատել չի լինի, կամ էլ Ադրբեջանն այնպիսի բաներ կպահանջի, որն իրագործել չի լինի։ Մեզ հետ խաղ են խաղում, իսկ ՀՀ իշխանություններն էլ անընդհատ զիջելու գնով են առաջ շարժվում»,- 168.am-ի հետ զրույցում նշեց Գուրգեն Խանջյանը։
«Բաքվում դատում են 23 հոգու, դատավարությունը շատ դաժան է, մեղադրանքները՝ նույնպես, բայց պարզ պետք է հասկանանք, որ սա մեր ազգի ու երկրի ստորացումն է։ Այս դատից հետո Բաքուն պահանջելու է նաև բոլոր այն անձանց, որոնք ինչ-որ կերպ եղել են Արցախում, Արցախի արդարությունը պաշտպանելու համար զենք է վերցրել։ Բաքուն բոլոր այս մարդկանց համարելու է հանցագործ։
Այս իշխանությունները չեն հասկանում, որ իրենց էլ են հասնելու, իրենք էլ են հրամաններ տվել Արցախում։
Իշխանությունները չեն ասում, թե, օրինակ, Արցախի ռազմաքաղաքական ղեկավարությունն ինչի՞ համար է կռվել, չեն ասում, որ այս մարդիկ իրենց հայրենակիցներին են պաշտպանել։
Սրանք կցկտուր ինչ-որ բաներ են ասում, ծնկաչոք են, ցավալի է, բայց սա փաստ է»,- ընդգծեց Գուրգեն Խանջյանը։Հիշեցնենք, որ 2023 թվականին Արցախում ապօրինի կալանավորվել և Բաքու են տեղափոխվել Արցախի նախկին 3 նախագահները՝ Արկադի Ղուկասյանը, Բակո Սահակյանը, Արայիկ Հարությունյանը, նախկին արտգործնախարար Դավիթ Բաբայանը, ԱԺ նախագահ Դավիթ Իշխանյանը, Պաշտպանության բանակի նախկին հրամանատար Լևոն Մնացականյանը, նախկին պետնախարար Ռուբեն Վարդանյանը, ՊԲ հրամանատարի նախկին տեղակալ Դավիթ Մանուկյանը։
