Թուրքիայի և Մեծ Բրիտանիայի դիվանագետները Անկարայում խորհրդակցությունների ժամանակ կքննարկեն Սիրիայից պատժամիջոցների վերացման հարցը։ Ինչպես ՏԱՍՍ-ին հայտնել է Թուրքիայի արտգործնախարարության աղբյուրը, այդ նպատակով երկուշաբթի օրը Թուրքիայի մայրաքաղաքում կհանդիպեն Թուրքիայի փոխարտգործնախարար Նուհ Յըլմազը և նրա բրիտանացի գործընկեր Համիշ Ֆալքոները։
«Սպասվում է, որ թուրքական կողմը կներկայացնի Թուրքիայի տեսակետներն ու ակնկալիքները՝ կապված Սիրիայում անվտանգության, կայունության և տնտեսական իրավիճակի հետ: Դա անհրաժեշտ է Սիրիայի վերականգնման և տնտեսական զարգացման համար»:
Դիվանագետները կվերլուծեն նաև «ազգային հաշտեցման» հարցում Սիրիայի նոր վարչակազմի ջանքերի շուրջ ստեղծված իրավիճակը և այդ քայլերին միջազգային հանրության կողմից աջակցության կարևորությունը։
Առանձին-առանձին Յըլմազն ու Ֆալքոները կքննարկեն Իսրայելի գործողությունները Սիրիայում։ «Ակնկալվում է, որ ուշադրությունը կկենտրոնանա Իսրայելի գործողությունները դադարեցնելու անհրաժեշտության վրա, որոնք բացահայտորեն խախտում և սպառնում են Սիրիայի ինքնիշխանությանը», - նշել է աղբյուրը։
