Վրաստանի խորհրդարանի իշխող «Վրացական երազանք» կուսակցության անդամները հավանություն են տվել 49 ընդդիմադիր պատգամավորի՝ մանդատներից հրաժարվելու հայտերին՝ օրենսդիր մարմնի պատգամավորների քանակը 150-ից պաշտոնապես նվազեցնելով 101-ի։ «Արմենպրես»-ի փոխանցմամբ՝ այս մասին հայտնում է Sputnik Georgia լրատվական գործակալությունը։
Դիմումները ներկայացրել են «Լելոն հանուն Վրաստանի», «Միասնություն-Ազգային շարժում» և «Կոալիցիա հանուն փոփոխությունների» ընդդիմադիր քաղաքական ուժերի բոլոր անդամները:
«Ընդդիմությունը չի կարող անընդհատ անհարգալից վերաբերմունք դրսևորել իր ընտրողների նկատմամբ, հրաժարվել խորհրդարանական աշխատանքներին մասնակցելուց և այս ամենն օգտագործել որպես շանտաժի գործիք»,- հայտնել է «Վրացական երազանք» խորհրդարանական մեծամասնության առաջնորդ Մամուկա Մդինարաձեն։
