ԱՄՆ նախագահ Դոնալդ Թրամփը թույլ է տվել Իրանի նախագահ Մասուդ Փեզեշյանի հետ հանդիպման հնարավորությունը։ Համապատասխան հայտարարությունը նա արել է երեքշաբթի օրը՝ Սպիտակ տանը լրագրողների հետ զրույցում, փոխանցում է ՏԱՍՍ-ը։Իրանի վրա ԱՄՆ-ի առավելագույն ճնշումը վերականգնելու հրամանագրի ստորագրումից հետո Թրամփը հույս է հայտնել, որ «ստիպված չի լինի այն շատ հաճախ օգտագործել»։
Հարցին, թե արդյոք նա կքննարկի Իրանի նախագահի հետ հանդիպման կամ անմիջական շփման հնարավորությունը, Թրամփը պատասխանել է՝ այո: «Կտեսնենք՝ կարո՞ղ ենք համաձայնության գալ կամ գործարք կնքել Իրանի հետ»,- նշել է ամերիկացի առաջնորդը։
Հնարավոր գործարքի մանրամասների վերաբերյալ ճշտող հարցին ի պատասխան՝ Թրամփն ընդգծել է, որ «Իրանին չի կարելի թույլ տալ միջուկային զենք ձեռք բերել»։
«Մենք չենք ցանկանում կոշտ դիրքորոշում որդեգրել Իրանի կամ մեկ ուրիշի նկատմամբ, սակայն նրանք չեն կարող միջուկային զենք ունենալ»,- ասել է ԱՄՆ նախագահը։
