ՀՀ վարչապետ Նիկոլ Փաշինյանը ֆեյսբուքյան ուղիղ եթերում խոսել է համընդհանուր հայտարարագրման պատճառների մասին. «Համընդհանուր հայտարարագրման համար կան մի քանի պատճառներ: Դրանցից մեկը հակակոռուպցիոն պայքարում մեր հետևողականությունն է: Կոռուպցիայի դեմ պայքարում մենք պետական բարձրաստիճան պաշտոնյաների հայտարարագրման համակարգեր ենք ներդրել, բայց այդ համակարգերը բավարար չեն կոռուպցիայի դեմ պայքարը և կոռուպցիայի` հանրության մեր տեսլականը իրականացնելու համար: Որովհետև պետական պաշտոնյաների հայտարարագրման համակարգը չի ծածկում այն նախկինից նաև հայտնի դեպքերը, երբ որ զոքանչի, դասարանցու, քենու միջոցով գործում են կոռուպցիոն սխեմաներ: Հիմա մենք, ըստ էության, համընդհանուր հայտարարագրով պաշտոնյաների բաջանաղներին, զոքանչներին, քեռիներին, քենիներին մտցնում ենք համընդհանուր հայտարարագրման համակարգ, և սրանով լուծում ենք հակակոռուպցիոն պայքարի շղթայի ամբողջացման հարցը:
Երկրորդը՝ եթե մենք պաշտոնյաներից պահանջում ենք թափանցիկություն, իրենք սկզբից` որպես քաղաքացի պետք է թափանցիկ լինեն, որ հետո դառնան պաշտոնյա: Համընդհանուր հայտարարագրման համակարգը մեզ կօգնի, որ մեր սոցիալական քաղաքականությունները ավելի հասցեական դարձնենք»:
Փաշինյանի խոսքով՝ նրանք, ովքեր հարկ չեն թաքցնում, համընդհանուր հայտարարագրով վճարելու են ավելի քիչ հարկ, որովհետև նաև որոշակի ետվճարներ են ստանալու առողջապահության և կրթության համար արված ծախսերի համար:
