Կալիֆոռնիայում շարունակվող անտառային հրդեհների պատճառով առանց էլեկտրականության է մնում ավելի քան 46,8 հազար սպառող։ Այս մասին են վկայում PowerOutage.us մոնիտորինգային ռեսուրսի տվյալները։
Նրանցից ավելի քան 32 հազարը միայն Լոս Անջելեսի կոմսությունում են։
Ըստ օդերեւութաբանների՝ հրդեհի արագ տարածման պատճառը չոր ու շատ քամոտ եղանակն է եղել։ Հրդեհների ընդհանուր մակերեսը գերազանցել է 16 հազար հեկտարը։
Հրդեհը ոչնչացրել է ավելի քան 12,3 հազար շինություն, այդ թվում՝ հեղինակավոր վայրերում հայտնի մարդկանց ունեցվածքը։ Այրվել են ԱՄՆ ներկայիս նախագահ Ջո Բայդենի որդու՝ Հանթերի, դերասանուհի և մոդել Փերիս Հիլթոնի, դերասան և ռեժիսոր Մել Գիբսոնի տները։ Վերջին տվյալներով՝ զոհվել է 24 մարդ։
Թալանի դեպքերի աճի ֆոնին ԱՄՆ իրավապահներն ուժեղացնում են անվտանգության միջոցառումները հրդեհներից տուժած տարածքներում։
