Թուրքիայի նախագահ Ռեջեփ Թայիփ Էրդողանը կկարողանա երրորդ անգամ առաջադրվել պետության ղեկավարի պաշտոնում՝ օգտվելով համապատասխան սահմանադրական դրույթից։ Նման կարծիք է հայտնել Թուրքիայի ղեկավարի ավագ խորհրդական Մեհմեթ Ուչումը։
«Սահմանադրության 116/3 հոդվածի համաձայն՝ նախագահ Էրդողանին առաջադրելու բացառիկ հնարավորություն կա, նրա առաջադրումը կարող է օրակարգ մտնել 2027 թվականի երկրորդ կեսին»,- X-ին գրել է խորհրդականը։
Նա նաև հերքել է Էրդողանի հնարավոր առաջադրման և քրդական հարցի լուծմանն ուղղված իշխանությունների կողմից ներկայումս իրականացվող նախաձեռնությունների միջև կապի առկայությունը, ինչի պատճառով, ինչպես կարծում են Թուրքիայի որոշ շրջանակներ, գործող նախագահը կարող է միավորներ հավաքել ընտրություններից առաջ։
Այս երկու հարցերի միջև, ինչպես նշեց Ուչումը, «չի կարող լինել որևէ կապ՝ ոչ ժամանակային, ոչ բովանդակային»:
Դեկտեմբերի 1-ին Թուրքիայի ղեկավարի խորհրդականն արդեն որպես օրինակ բերել է սահմանադրության 116/3-րդ հոդվածը։ Այնուհետև նա բացատրել է, որ «եթե խորհրդարանը որոշի արտահերթ ընտրություններ անցկացնել գործող նախագահի երկրորդ ժամկետում, ապա նախագահը կարող է կրկին թեկնածու լինել ընտրություններին»։
