Սիրիայի նոր իշխանությունների ղեկավար Ահմեդ ալ-Շարաան իր առաջին արտասահմանյան այցը կկատարի Թուրքիա։ Այն կարող է տեղի ունենալ որքան հնարավոր է շուտ, հայտնում է Yeni Şafak թերթը։
Հրապարակման համաձայն՝ այցը պետք է կայանար առաջիկա օրերին, սակայն ծրագրում փոփոխությունների պատճառով հետաձգվել է։ Սպասվում է, որ այցի ընթացքում ալ-Շարաան կհանդիպի Թուրքիայի նախագահ Ռեջեփ Թայիփ Էրդողանի հետ, որին, ինչպես գրում է թերթը, Սիրիայի նոր իշխանությունների առաջնորդը մտադիր է շնորհակալություն հայտնել Բաշար ալ-Ասադի վարչակազմը տապալելու գործում աջակցության համար։
Yeni Şafak-ը հիշեցնում է, որ Սիրիայում ընդդիմության իշխանության գալուց հետո Դամասկոս այցելած առաջին օտարերկրյա ներկայացուցիչը Թուրքիայի հետախուզական ծառայության ղեկավար Իբրահիմ Կալինն էր։ Նրան հետեւելով Սիրիայի մայրաքաղաք է այցելել Թուրքիայի արտգործնախարար Հաքան Ֆիդանը։
2024 թվականի նոյեմբերի վերջին զինված ընդդիմադիր խմբավորումները լայնածավալ հարձակում են սկսել սիրիական բանակի դիրքերի դեմ։
