Կատարի արտաքին գործերի նախարարության պետնախարար Մուհամմեդ ալ-Խուլեյֆին ժամանել է Դամասկոս՝ Qatar Airways ազգային ավիաընկերության ինքնաթիռով։ Այս մասին հայտարարել է վարչապետի խորհրդական, էմիրության արտաքին գործերի նախարարության պաշտոնական ներկայացուցիչ Մաջիդ բեն Մուհամմեդ ալ Անսարին։
«Նորին գերազանցություն ալ-Խուլեյֆին՝ բարձրաստիճան Կատարի պաշտոնական պատվիրակության գլխավորությամբ, վերջերս Դամասկոս է ժամանել Qatar Airways-ի առաջին ինքնաթիռով, որը վայրէջք է կատարել Սիրիայի մայրաքաղաքի օդանավակայանում՝ Բաշար ալ-Ասադի տապալումից հետո»,-գրել է Անսարին X սոցիալական ցանցի իր էջում։ Կատարի պատվիրակությունը նախատեսում է մի շարք «հանդիպումներ սիրիացի պաշտոնյաների հետ»,-հավելել է նա:
Դեկտեմբերի 21-ին Դամասկոսում Կատարի դեսպանատունը վերսկսել է աշխատանքը 2011 թվականին Սիրիայում հակամարտության պատճառով դիվանագիտական ներկայացուցչության փակումից 13 տարի անց։ Դիվանագիտական ներկայացուցչության շենքի վերևում բարձրացվել է էմիրության դրոշը։ Դեսպանատան բացման արարողությանը մասնակցել է Սիրիայում Կատարի գործերի ժամանակավոր հավատարմատար Խալիֆա Աբդուլլահ Ալ Մահմուդ ալ-Շարիֆը։
