Մեծ Բրիտանիայի պատժամիջոցները Վրաստանի ներքին գործերի նախարարության ղեկավարության, այդ թվում՝ նախարար Վախթանգ Գոմելաուրիի դեմ, վնասում են երկու երկրների բարեկամությանը։ Այս մասին հայտարարել է Վրաստանի արտգործնախարար Մակա Բոչորիշվիլին Մեծ Բրիտանիայի դեսպան Գարեթ Ուորդի հետ հանդիպմանը։
«Հանդիպման ժամանակ վրացական կողմը մտահոգություն է հայտնել Միացյալ Թագավորության կողմից վրացի պաշտոնյաների դեմ պատժամիջոցների կիրառման կապակցությամբ, պարզաբանել է, որ նման գործողությունները վնասում են երկու երկրների միջև առկա բարեկամությանը», - ասվում է Վրաստանի ԱԳՆ մամուլի ծառայության տարածած հաղորդագրությունում։
Բոչորիշվիլին արտաքին գործերի նախարարություն կանչված դեսպանին ասել է նաև, որ «առանձնահատուկ կարևոր է Վրաստանում տեղի ունեցող գործընթացների օբյեկտիվ և անաչառ գնահատականը»։ Հանդիպման ավարտին կողմերը հույս են հայտնել, որ Թբիլիսիի և Լոնդոնի համագործակցությունը կվերադառնա նախկին դինամիկային։
