Եվրամիության երկրների արտգործնախարարները դեկտեմբերի 16-ին Բրյուսելում կայանալիք հանդիպմանը կքննարկեն Վրաստանում տիրող իրավիճակը։ Այս մասին լրագրողներին ասել է Վրաստանում ԵՄ դեսպան Պավել Գերչինսկին։
«Վերջերս մի քանի անգամ քննարկվել է Վրաստանի հարցը, Վրաստանի հարցը կքննարկեն ԵՄ 27 երկրների արտաքին գործերի նախարարները դեկտեմբերի 16-ին կայանալիք հանդիպմանը: Կարծում եմ՝ այս հանդիպումից հետո կարող եմ ձեզ ավելի շատ տեղեկություններ տրամադրել»,- ասել է Գերչինսկին։
Վրաստանի վարչապետ Իրակլի Կոբախիձեն ավելի վաղ հայտարարել էր, որ իշխող «Վրացական երազանք-Ժողովրդավարական Վրաստան» կուսակցությունը որոշել է մինչև 2028 թվականի վերջ օրակարգ չներառել Եվրամիությանն անդամակցելու շուրջ բանակցությունների հարցը և հրաժարվել համայնքի բյուջետային բոլոր դրամաշնորհներից։
Կառավարության ղեկավարի խոսքով՝ դրա պատճառներն են եղել ԵՄ-ի մշտական շանտաժը՝ անդամակցության երկխոսության մեկնարկի վերաբերյալ, խորհրդարանի ընդունած մի շարք օրենքների չեղարկման պահանջները և Վրաստանի իշխանությունների դեմ պատժամիջոցներ կիրառելու կոչերը։
