Իսրայելի և Լիբանանի միջև հրադադարի համաձայնագիրը կդառնա մշտական, այլ ոչ թե սահմանափակվելու է 60-օրյա անցումային շրջանով։ Այդ մասին Քաթարի «Ալ Ջազիրա» հեռուստաալիքին տված բացառիկ հարցազրույցում հայտարարել է տարածաշրջանում ԱՄՆ հատուկ բանագնաց, նախագահ Ջո Բայդենի էմիսար Ամոս Հոքսթինը։
«Այս հրադադարի համաձայնագրերը մշտական են, դա 60 օրվա համար չէ: Սա մշտական հրադադար է, որը սկսվում է Բեյրութի տեղական ժամանակով առավոտյան ժամը 4-ին »,- ասել է հատուկ բանագնացը:
Նրա խոսքով՝ իսրայելական զինվորականները, որոնք գտնվում են լիբանանյան հողի վրա սահմանից երկու-երեք կիլոմետր հեռավորության վրա, առայժմ կմնան տեղում, և «երբ լիբանանյան բանակը վերադասավորվի հարավ, իսրայելական զորքերը կհեռանան»։
«Իսրայելական զորքերի առաջին մասերը կհեռանան առաջիկա մի քանի օրերի կամ առաջին երկու շաբաթվա ընթացքում, և աստիճանաբար, 60 օրվա ընթացքում, նրանք բոլորը կհեռանան», - ասել է Հոքսթինը:
