Առնվազն վեց մարդ է զոհվել, այդ թվում՝ երկու զինվորական, իսրայելական ավիահարվածների հետևանքով Սիրիայի և Լիբանանի սահմանին անցակետերի վրա։ Այս մասին հայտնում է սիրիական SANA գործակալությունը՝ հղում անելով պաշտպանության նախարարության աղբյուրին։
«Տեղական ժամանակով 00:05-ին իսրայելական թշնամին ագրեսիա է իրականացրել Լիբանանի օդային տարածքից՝ կրակելով Սիրիայի և Լիբանանի սահմանին գտնվող Հոմս նահանգի անցակետերի ուղղությամբ»,-ասել է գործակալության զրուցակիցը։
Հարձակման հետևանքով վիրավորվել է առնվազն 12 մարդ, այդ թվում՝ կանայք և երեխաներ։ Բացի այդ, վիրավորվել են սիրիական Կարմիր մահիկի աշխատակիցները։
Ավելի վաղ SANA-ն հայտնել էր, որ իսրայելցի զինվորականները հարձակվել են սիրիա-լիբանանյան սահմանի սահմանային անցակետերի վրա։ Հրթիռակոծվել է առնվազն երկու անցակետ՝ Հոմս նահանգի Ալ-Դաբուսիա և Տարտուս նահանգի Էլ-Արիդա:
