Ուրուգվայում նախագահական ընտրությունների երկրորդ փուլում հաղթում է ընդդիմադիր ձախ կենտրոնամետ «Լայն ճակատ» կոալիցիայի թեկնածու Յամանդու Օրսին (Yamandu Orsi)։ Այս մասին են վկայում ընտրական դատարանի կողմից հրապարակված ձայների հաշվարկի արդյունքները ընտրատեղամասերի 81,26 տոկոսի տվյալների մշակումից հետո։
Օրսիի օգտին քվեարկել է 942 470 ընտրող։ Նրա հակառակորդին՝ իշխող աջ կենտրոնամետ ազգային կուսակցության թեկնածու Ալվարո Դելգադոյի (Alvaro Delgado) օգտին քվեարկել է 898 767 ձայն: Դելգադոն արդեն ընդունել է իր պարտությունը ընտրություններում և շնորհավորել է իր մրցակցին։ Օրսիին հաղթանակի կապակցությամբ շնորհավորել է նաեւ Ուրուգվայի ներկայիս նախագահ Լուիս Լակալե Պուն (Luis Lacalle Pou) ։
Օրսին, ով 2015-ից 2024 թվականներին աշխատել է Կանելոնես դեպարտամենտի քաղաքապետի պաշտոնում, իր առաջնահերթություններից է համարում հանցագործության դեմ պայքարը, որը վերջին տարիներին աճել է Ուրուգվայում և թմրանյութերի տարանցումը երկրի տարածքով: Քաղաքական գործիչը, որին աջակցում է Ուրուգվայի նախկին նախագահ Խոսե Մուխիկան, խոստանում է նաև նոր աշխատատեղեր ստեղծել և բարձրացնել ցածր եկամուտ ունեցող աշխատողների աշխատավարձերը։
Արտաքին քաղաքականության մեջ նա որպես առաջնահերթություն ընդգծում է տարածաշրջանային կազմակերպությունների, այդ թվում՝ Հարավային Ամերիկայի ընդհանուր շուկայի (Մերկոսուր) շրջանակներում ինտեգրացիոն գործընթացների արագացման անհրաժեշտությունը։
Նախընտրական արշավի ընթացքում Օրսին Վենեսուելայի նախագահ Նիկոլաս Մադուրոյի կառավարությունն ավտորիտար է անվանել եւ կասկածի տակ է դրել հուլիսի 28-ին Բոլիվարյան Հանրապետությունում անցկացված պետության ղեկավարի ընտրություններում ձայների հաշվարկի թափանցիկությունը: Դրանցում հաղթել Է Մադուրոն։Ուրուգվայի նորընտիր նախագահի երդմնակալության արարողությունը տեղի կունենա 2025 թվականի մարտի 1-ին
