Ադրբեջանի նախագահ Իլհամ Ալիևը և Բելառուսի նախագահ Ալեքսանդր Լուկաշենկոն այցելել են օկուպացված հայկական Շուշի քաղաք։
Այցի մասին հայտնում է APA-ն՝ չմանրամասնելով։ Նշվում է միայն, որ Լուկաշենկոն և Ալիևն այցելել են նորկառույց շենք։
Նախօրեին Ալիևի հետ հանդիպմանը հաջորդած մամուլի ասուլիսում Լուկաշենկոն, Ադրբեջանի նախագահին «եղբայր» անվանելով, մի շարք բացահայտ Հայաստանին ոչ բարեկամական հայտարարություններ արեց ։
«Ես հիշեցի մեր զրույցը պատերազմից առաջ, ձեր ազատամարտից առաջ, երբ միասին ճաշի ժամանակ փիլիսոփայորեն զրուցում էինք։ Հետո եկանք այն եզրակացության, որ պատերազմում հնարավոր է հաղթել»,- ի թիվս այլոց ասել է Լուկաշենկոն։
ՀԱՊԿ-ը, որի անդամ են Բելառուսը և Հայաստանը, իսկ Ադրբեջանը՝ ոչ, դեռ չի արձագանքել Ալեքսանդր Լուկաշենկոյի այս սադրիչ հայտարարություններին։
