Թուրքիան կրկին հրավիրել է Ռուսաստանին և Ուկրաինային բանակցություններ վարել իր տարածքում։ Անկարան կարծում է, որ ուկրաինական հակամարտությունը լուծելիս պետք է խորհրդակցել եվրոպական երկրների հետ, ասել է Թուրքիայի արտգործնախարար Հաքան Ֆիդանը։
Նա ավելի վաղ հայտնել էր, որ Անկարան ԱՄՆ-ի և եվրոպական երկրների հետ քննարկում է Ուկրաինայում հակամարտությունը դադարեցնելու հավանականությունը և նորը կանխելու ուղիները։«Մենք երկու կողմերին էլ առաջարկում ենք բանակցություններ վարել մեր տարածքում։ Ես այնպիսի տպավորություն ունեմ, որ ԱՄՆ-ը այժմ մշակում է խաղաղության ծրագիր»,-Մյունխենի անվտանգության համաժողովի շրջանակներում ասել է Ֆիդանը TRT World-ին տված հարցազրույցում:
Մեկնաբանելով մի շարք եվրոպացի առաջնորդների հայտարարություններն այն մասին, որ Ուկրաինայի հարցով բանակցություններ վարելիս անհրաժեշտ է խորհրդակցել ԵՄ-ի հետ, Ֆիդանը նշել է, որ նրանք «որոշ առումներով ճիշտ են»։Ֆիդանը ընդգծել է, որ Անկարան կարող է ավելին առաջարկել բանակցողներին, քան մի շարք այլ խաղացողներ, քանի որ Թուրքիան սերտ կապեր ունի ինչպես Մոսկվայի, այնպես էլ Կիևի հետ։
