Euromedia 24 -ի տեղեկություններով գործադուլ հայտարարած ավտոբուսի վարորդներին աշխատանքից ազատմանը նախորդել են Ավինյանի հետ հաշտեցման հանդիպումներ։ Ըստ աղբյուրի՝ Երևանի քաղաքապետ Տիգրան Ավինյանը սկզբում հակված չի եղել պատժամիջոցներ կիրառելուն, ինչ որ թաղային հեղինակության միջոցով բանագնաց է ուղարկել վարորդների մոտ՝ մոտավորապես այսպիսի առաջարկով՝ գլուխներդ կախ հետ գնացեք ու անցեք աշխատանքի կամ սուս ու փուս առանց միտինգների ազատման դիմումներ գրեք , հեռացեք, հակառակ դեպքում, եթե բունտերը շարունակվեն , պրոցեսը ավելի աղմուկ կհանի, ձեզ դա պետք չի, գործիք չդառնաք ընդդիմության ձեռքին ու քրեական հոդվածով ձեզ դատելու հիմքեր չստեղծեք անտեղի։ Մոտավորապես այս կոնտեքստով հաշտեցման առաջարկին, ասում են, 4 հոգի ընդդիմացել են ու երեկ ազատման դիմումներ են գրել կամովի։
Բայց ահա Տիգրան Ավինյանը Հանրային ՀԸ հարցազրույցի ժամանակ հայտարարել է, որ 32 վարորդ հեռացվել է աշխատանքից, սակայն վարորդները իրենց գործազուրկ դառնալու մասին միայն առավոտյան են իմացել աշխատավայր գնալիս։ Ընդ որում հենց այն վարորդներն են թիրախավորվել, ովքեր ԶԼՄ-ների տեսախցիկների առջև կանգնել ու շարադրել են իրենց դժգոհություններն ու մտահոգությունը բացեիբաց և պահանջել են կառուցողական մոտեցում։ Հեռացման հիմքերը առայժմ հայտնի չէ։ Իրավաբանների խոսքով այս հեռացումները իրավական հիմք չունեն։
Հիշեցնենք, երեկ՝ դեկտեմբերի 3-ին, Երևանի երթուղային ցանցն սպասարկող մեծաթիվ վարորդներ դուրս չեկան գիծ և հայտարարել էին գործադուլ՝ պահանջելով ,որ գործատու «Երևան ավտոբուս» ՓԲԸ – ն և վերադաս Երևանի քաղաքապետարանը ՝ վերանայեն իրենց աշխատանքային պայմանները և աշխատավարձի հաշմման մեթոդաբանությունը։ Առավոտից պարալիզացված էր ողջ քաղաքը, մարդիկ ժամերով սպասում էին ավտոբուսներին, իսկ տաքսի ծառայությունների մեկնարկային կետից գինը սահմանվում էր մինչև 1500 դրամ։
