Իսրայելի պաշտպանության բանակը հարձակում է սկսել Լիբանանում «ահաբեկչական թիրախների» վրա այն բանից հետո, երբ «Հեզբոլլահը» հրթիռներ է արձակել Դով լեռան ուղղությամբ։ Այս մասին հայտնում է Իսրայելի ՊԲ–ի տելեգրամյան ալիքը, փոխանցում է Gazeta.ru–ն։
«Իսրայելական բանակը ներկայումս հարվածներ է հասցնում Լիբանանում ահաբեկչական թիրախներին», - ասվում է հայտարարության մեջ:
Նախօրեին Իսրայելի վարչապետ Բենիամին Նեթանյահուն ասել էր, որ իսրայելական բանակը խստորեն հետևում է Լիբանանի հետ հրադադարին, միևնույն ժամանակ վճռականություն է ցուցաբերում «Հեզբոլլահից» բխող ցանկացած խախտումներին արձագանքելու հարցում։
Նոյեմբերի 26-ին Իսրայելը հրադադարի վերաբերյալ համաձայնագիր էր ստորագրել Լիբանանի հետ։ Համաձայնագրով նախատեսվում էր 60 օրվա ընթացքում իսրայելական զորքերի դուրսբերում Լիբանանի տարածքից։
