Իսրայելը և շիական «Հեզբոլլահ» կազմակերպությունը մոտ են Լիբանանում հրադադարի համաձայնագրի կնքմանը։ Այս մասին հայտնում է CNN-ը՝ հղում անելով իր աղբյուրին։
Նրա խոսքով՝ կողմերը «շատ մոտ են» համաձայնությանը, չնայած «իսրայելական հարձակումների» աճին։ «Մենք շարժվում ենք այս ուղղությամբ (դեպի համաձայնագիր կնքում), բայց դեռ կան որոշ հարցեր, որոնք պետք է լուծվեն», - հեռուստաալիքին ասել է հրեական պետության ներկայացուցիչը:
Սեպտեմբերի 23-ին Իսրայելը սկսեց «Հյուսիսի նետեր» գործողությունը Լիբանանում Հեզբոլլահի ուժերի դեմ, որի ընթացքում զանգվածային հարվածներ էր հասցրել կազմակերպության ռազմական օբյեկտներին: Հայտարարված նպատակն էր ստեղծել անվտանգ պայմաններ հրեական պետության հյուսիսային սահմանային շրջաններում տասնյակ հազարավոր բնակիչների վերադարձի համար։ Հոկտեմբերի 1-ի գիշերը Իսրայելի բանակը հայտարարեց հարավային Լիբանանի սահմանային շրջաններում ցամաքային գործողություն սկսելու մասին։
