Իրանը շահագործման է հանձնել ուրանի հարստացման նոր առաջադեմ ցենտրիֆուգներ, կիրակի օրը հայտարարել է Մեջլիսի նախագահ Մոհամմադ Բաղեր Ղալիբաֆը։
Նրա խոսքով՝ Իրանի իշխանություններն այս քայլին են դիմել՝ ի պատասխան վերջերս ՄԱԳԱՏԷ-ի Կառավարիչների խորհրդի նիստում հակաիրանական բանաձևի ընդունմանը։
«Իրանի պատասխանը հիմնված է փոխադարձության սկզբունքի վրա, քանի որ ՄԱԳԱՏԷ-ի Կառավարիչների խորհուրդն օգտագործվել է անարդար քաղաքական նպատակներով»,- ասել է նա։
Ղալիբաֆը Մեծ Բրիտանիայի, Գերմանիայի, ԱՄՆ-ի և Ֆրանսիայի մոտեցումն անվանել է «քաղաքականացված և ապակառուցողական»:
ՄԱԳԱՏԷ-ի Կառավարիչների խորհուրդն այս շաբաթվա սկզբին բանաձև ընդունեց, որը դատապարտում էր Իրանին՝ միջուկային խնդրի շուրջ գործակալության հետ լիարժեք համագործակցության ձախողման համար:
Դիվանագետները հայտնել են, որ Խորհրդի 19 անդամները կողմ են քվեարկել բանաձևին, իսկ Ռուսաստանը, Չինաստանը և Բուրկինա Ֆասոն դեմ են եղել, 12-ը ձեռնպահ են մնացել, մեկը չի քվեարկել:
Բանաձևն առաջ են քաշել Ֆրանսիան, Գերմանիան եւ Մեծ Բրիտանիան՝ ԱՄՆ-ի աջակցությամբ։
Նշվում է, որ ՄԱԳԱՏԷ-ն Իրանին կոչ է արել «տեխնիկապես արժանահավատ բացատրություններ» տրամադրել Թեհրանի մերձակայքում գտնվող Վարամին և Թուրկուզաբադ վայրերում վերամշակված ուրանի մասնիկների առկայության վերաբերյալ: Բացի այդ, բանաձևը կոչ է անում Իրանին տեղեկացնել ՄԱԿ-ի դիտորդ մարմնին միջուկային նյութի գտնվելու վայրի մասին և ՄԱԳԱՏԷ-ի տեսուչների համար ապահովել մուտք՝ իրանական միջուկային բոլոր օբյեկտներ:
Բանաձևը նաև պահանջում է ՄԱԳԱՏԷ-ի գլխավոր տնօրեն Ռաֆայել Գրոսսիից Իրանի միջուկային ծրագրի վերաբերյալ թարմացված գնահատական տալ՝ 2025 թվականի գարնանից ոչ ուշ:
