Դելիի իշխանությունները օդի խիստ աղտոտվածության պատճառով փակել են դպրոցները, դադարեցրել շինարարական աշխատանքները և սահմանափակել բեռնատարների մուտքը Հնդկաստանի մայրաքաղաք, երկուշաբթի հաղորդել է Associated Press-ը:
Այսպիսով, քաղաք մուտք կգործեն միայն կենսական նշանակություն ունեցող ապրանքներ տեղափոխող բեռնատարները։
Հաշվի առնելով օդում մարդու առողջության համար վնասակար մասնիկների մեծ պարունակությունը՝ իշխանությունները երեխաներին, տարեցներին և շնչառական քրոնիկ հիվանդություններ ունեցող մարդկանց կոչ են արել մնալ տանը։
Բացի այդ, ավիաընկերությունները նախազգուշացրել են վատ տեսանելիության պատճառով թռիչքների հետաձգման մասին:
Մայրաքաղաքի որոշ շրջաններում օդի աղտոտվածության մակարդակը ավելի քան 50 անգամ գերազանցում է Առողջապահության համաշխարհային կազմակերպության սահմանած թույլատրելի նորմատիվը։
Դելիի բնակիչները սոցիալական ցանցերում բողոքում են գլխացավերից և չոր հազից, որոնք, ենթադրաբար, պայմանավորված են օդի աղտոտվածության բարձր մակարդակով, գրում է Associated Press-ը։
