ԱՄՆ նորընտիր նախագահ Դոնալդ Թրամփի կողմից պետքարտուղարի պաշտոնում առաջադրված Մարկո Ռուբիոն (Marco Rubio) խոստացել է ուժի դիրքերից աշխատել խաղաղության համար և ամեն ինչից վեր դասել Միացյալ Նահանգների շահերը: Նա համապատասխան հրապարակումը տեղադրել է սոցցանցի իր X էջում .
«Նախագահ Թրամփի ղեկավարությամբ մենք խաղաղության կհասնենք ուժի միջոցով և միշտ առաջին տեղում կդնենք ամերիկացիների և Ամերիկայի շահերը»,- գրել է պետքարտուղարի պաշտոնի հավակնորդ Ռուբիոն։ Նա նաեւ շնորհակալություն է հայտնել Թրամփին վստահության համար եւ խոստացել է ամեն օր աշխատել նորընտիր նախագահի արտաքին քաղաքական ծրագրի իրականացման ուղղությամբ։
Ավելի վաղ ԱՄՆ նորընտիր նախագահ Դոնալդ Թրամփը հայտարարել էր իր նոր վարչակազմում պետքարտուղարի պաշտոնում Ֆլորիդայից ԱՄՆ սենատոր Մարկո Ռուբիոյին նշանակելու մտադրության մասին։ Ռուբիոն հայտնի է արտաքին քաղաքականության վերաբերյալ իր կոշտ հայացքներով, այդ թվում՝ Չինաստանի հետ մրցակցությունը մեծացնելու անհրաժեշտությամբ, Իսրայելին աջակցելով և Իրանի միջուկային ծրագրին ընդդիմանալով:
