Թուրքիան Սև ծով է ուղարկել «Օսման Ղազի» անվանումը կրող բնական գազի վերամշակման իր առաջին լողացող հարթակը։ Օբյեկտի շահագործումից հետո Սաքարիայի հանքավայրում գազի արդյունահանումը նախատեսվում է կրկնապատկել՝ մինչև 2027 թվականը հասցնելով օրական 20 միլիոն խորանարդ մետրի։
Զոնգուլդաք նահանգի Ֆիլյոս նավահանգստից հարթակի ճանապարհման առթիվ հղած տեսաուղերձում այս մասին հայտարարել է Թուրքիայի նախագահ Ռեջեփ Թայիփ Էրդողանը, փոխանցում է Anadolu գործակալությունը։
«Այսօր մենք բոլորովին նոր էջ ենք բացում մեր էներգետիկայի պատմության մեջ։ «Օսման Ղազին», որն ըստ էության լողացող արդյունաբերական համալիր է, ուղարկում ենք Սև ծով»,— նշել է Էրդողանը։Թուրքիայի նախագահը հիշեցրել է, որ լողացող արտադրական առաջին հարթակը ձեռք բերելու մտադրության մասին հայտարարել էր 2024 թվականի հուլիսին։ 2025 թվականի մայիսին «Օսման Ղազի» անվանումը ստացած օբյեկտը Ստամբուլի Դոլմաբահչե պալատի մոտից տեղափոխվել էր Ֆիլյոս նավահանգիստ։
Էրդողանի խոսքով՝ հարթակը դառնալու է թուրքական «Կապույտ հայրենիք» հայեցակարգի առաջին արտադրական օբյեկտը, որն արտացոլում է երկրի ծովային հավակնությունները «Թուրքիայի դարաշրջան» ազգային ծրագրի շրջանակում։
«Osman Gazi»-ն սարքավորված է 21 տեխնոլոգիական մոդուլով։ Այն ընդունելու է «Սաքարիա» հանքավայրի հորատանցքերի բնական գազը, վերամշակելու է այն և ստորջրյա խողովակաշարերով ուղարկելու Ֆիլյոս ափ։ Հարթակը նախատեսված է 20 տարվա շուրջօրյա աշխատանքի համար և կարող է տեղավորել մինչև 140 աշխատակցի։
Էրդողանը հայտարարել է, որ 2027 թվականից Թուրքիայի սեփական գազը կապահովի երկրի յուրաքանչյուր երրորդ ընտանիքի կարիքները։ Նախագահի աշխատակազմի հանրային կապերի վարչության տվյալներով՝ հարթակի նախագծային հզորության արտահանումը թույլ կտա գազով ապահովել շուրջ 8 միլիոն տնային տնտեսություն։ Ակնկալվում է, որ օբյեկտի տարեկան ներդրումը տնտեսության մեջ կկազմի 3,5 միլիարդ դոլար։
Թուրքիայի էներգետիկայի և բնական պաշարների նախարար Ալփարսլան Բայրաքթարը, ելույթ ունենալով Ֆիլյոսում տեղի ունեցած արարողության ժամանակ, նշել է նաև, որ հարթակը թույլ կտա «Սաքարիա» հանքավայրում գազի օրական արդյունահանումը հասցնել մինչև 20 միլիոն խորանարդ մետրի (2027 թվականին)։ «Osman Gazi»-ն կդառնա բնական գազի վերամշակման առաջին լողացող կայանը Թուրքիայում։
