Yerkir.am լրատվական կայքի գլխավոր խմբագիր, պատմաբան Վահե Սարգսյանն անդրադարձել է վրաց-ադրբեջանական լարվածությանը՝ նշելով.
«Կրկին լարվել են վրաց-ադրբեջանական հարաբերությունները, կրկին պատճառը Ադրբեջանի կազմում գտնվող Վրաստանի տարածքների վրա (պատմական վրացական Հերեթին կամ Սաինգիլոն, այսօրվա Ադրբեջանի Բելոկանի, Զաքաթալայի և Կախի շրջանները) քրիստոնեական հուշարձանների ու տաճարների աղվանացումն ու յուրացումն է Ադրբեջանի կողմից։
Այս անգամ լարվածության պատճառը Ադրբեջանի կողմից վրացապատկան Սաինգիլոյի Քուրմուխիի Սուրբ Գևորգ եկեղեցում և հարող տարածքում իրականացվող շինաշխատանքներն են։ Վրաստանի Պատրիարքարանը հրատապ հայտարարություն էր տարածել՝ փաստն անվանելով մտահոգիչ։
Ի պատասխան՝ Ադրբեջանը սպառնացել է Վրաց Ուղղափառ եկեղեցուն և խորհուրդ տվել չկրկնել Հայ եկեղեցու «սխալները»։
Խնդիրն այն է, որ Ադրբեջանը աղվանական է համարում և, իրեն հայտարարալեով աղվանական մշակույթի ժառանգորդ, յուրացնում ոչ միայն Արցախի հոգևոր ժառանգությունը, այլ նաև հյուսիսում գտնվող վրացապատկան Սաինգիլոյի քրիստոնեական հուշարձանները, որոնց թվում և նշված Սուրբ Գևորգն ու վրաց-ադրբեջանական ուղիղ սահմանագծին գտնվող վրացական հռչակավոր Դավիթ Գարեջիի վանական համալիրը։
Դեռևս 44-օրյայից առաջ՝ 2019-ի հուլիսին, անդրադառնալով վրաց-ադրբեջանական հերթական սահմանային լարվածությանն ու Դավիթ Գարեջիի վանական համալիրի շուրջ վեճին, հայտարարել էի, որ Դավիթ Գարեջիի խնդրի լուծման բանալին Արցախում է, և պետք է Վրաստանը ևս դեմ դուրս գար Ադրբեջանի զավթողական քաղաքականությանը Արցախի քրիստոնական ժառանգության հանդեպ։ Չի՛ կարող, որ դրանք մի տեղ համարվեն աղվանական ու յուրացվեն, մեկ այլ տեղ՝ վրացական ու հանձնվեն Վրաց Ուղղափառ եկեղեցուն․ Ադրբեջանը շղթայաբար և հավասարապես կուլ է տալու թե՛ հայապատկան, թե՛ վրացապատկան ժառանգությունը։ Բառացիորեն ասել էի այն, ինչ տեղի է ունենում այսօր:
Հետևաբար, թեև ուշացած, բայց ժամանակն է, որ ձևավորվի հայ-վրացական համատեղ պայքար ընդդեմ Ադրբեջանի զավթողական ու գիշատիչ քայլերի և հանուն Այսրկովկասում քրիստոնեական քաղաքակրթական արժեքների փրկության»։
