Ռուսական և ուկրաինական կողմերը շարունակում են փոխադարձ զանգվածային հարձակումներն ու հարվածները, որոնց հետևանքով գրանցվել են մարդկային կորուստներ, տուժածներ և նյութական վնասներ: Այս մասին հաղորդում է Report գործակալությունը:
Ռուսաստանի Կրասնոդորի երկրամասի օպերատիվ շտաբի փոխանցմամբ Սոչիի առափնյա տարածքում անօդաչու ծովային սարքերի հարձակման հետևանքով տուժել է 28 մարդ: Հիվանդանոցում շարունակում են մնալ չորս տուժած՝ երեք մեծահասակ և մեկ երեխա:
Միևնույն ժամանակ, Բելգորոդի մարզի ղեկավարի պաշտոնակատար Ալեքսանդր Շուվաևը տեղեկացրել է մեկ զոհի և 13 վիրավորի մասին:
Զուգահեռաբար, Ուկրաինայի ազգային ոստիկանության մամուլի ծառայությունը հայտնել է, որ ռուսական հարվածների հետևանքով Սումիի մարզում զոհվել է հինգ, վիրավորվել՝ 24 մարդ:
Ուկրաինայի նախագահ Վլադիմիր Զելենսկին էլ հայտարարել է, որ վերջին մեկ օրում երկրի զինված ուժերը հարվածներ են հասցրել ռուսական ռազմական գործողությունները ապահովող ութ ենթակառուցվածքների ուղղությամբ, այդ թվում՝ նավթամշակման գործարանի և Դաղստանի առևտրային ծովային նավահանգիստի վրա:
Ընդհանուր առմամբ, ըստ ուկրաինական աղբյուրների, սեպտեմբերի 10-ի գիշերը ռուսական զորքերը կիրառել են 149 հարվածային անօդաչու թռչող սարք, որոնցից 128-ը չեզոքացվել են հակաօդային պաշտպանության միջոցներով:
