Կոլումբիայի շրջանի դաշնային դատարանը դատախազության պահանջով մինչև դեկտեմբերի 2-ը կասեցրել է բոլոր ծրագրված միջոցառումները՝ 2021 թվականի հունվարին Դոնալդ Թրամփի՝ իշխանությունը պահպանելու ենթադրյալ փորձի գործով, չնայած ԱՄՆ նախագահական ընտրություններում նրա պարտությանը: Այս մասին ասված է դատավոր Տանի Չատկենի որոշման մեջ։
Նա բավարարել է ԱՄՆ հատուկ դատախազ Ջեք Սմիթի նախկինում ներկայացված միջնորդությունը։ Վերջինս դատարանին խնդրել է չեղարկել նախաքննության շրջանակներում նախատեսված բոլոր միջոցառումներն ու նիստերը։ Սմիթը նշել է, որ «նոյեմբերի 5-ի ընտրություններից հետո ակնկալվում է, որ ամբաստանյալը կհաստատվի որպես Միացյալ Նահանգների նորընտիր նախագահ 2025 թվականի հունվարի 6-ին, իսկ երդմնակալությունը տեղի կունենա 2025 թվականի հունվարի 20-ին»:
Հատուկ դատախազը բացատրել է, որ մեղադրող կողմը պետք է «գնահատի այս աննախադեպ հանգամանքները և որոշի համապատասխան ընթացքը»:
Սմիթն ասել է, որ իր գրասենյակը «կներկայացնի զեկույց կամ այլ կերպ կտեղեկացնի դատարանին դեկտեմբերի 2-ին իր քննարկումների արդյունքների մասին»: Պաշտպանական կողմն այս սցենարի վերաբերյալ առարկություններ չի ներկայացրել։
Սմիթը 2023 թվականի օգոստոսին հայտարարել էր Թրամփի դեմ չորս հոդվածներով մեղադրանքներ առաջադրելու մասին։ Հանրապետականին առաջադրված ամենածանր հանցագործությունների համար առավելագույն պատիժը 20 տարվա ազատազրկումն էր։
Ավելի վաղ NBC News-ը, հղում անելով իր աղբյուրներին, հայտնել էր, որ ԱՄՆ արդարադատության նախարարությունը քննարկում է Թրամփի դեմ երկու դաշնային քրեական գործերով հետաքննությունը դադարեցնելու հնարավորությունը՝ նախքան նրա պաշտոնը ստանձնելը։
